Papur

Yn y Deyrnas Gyfunol, rydyn ni’n defnyddio 12.5 miliwn o dunelli o bapur bob blwyddyn.

Trwy ailgylchu papur, gallwn ni arbed ynni, cwtogi ar garbon deuocsid ac osgoi claddu papur gwastraff mewn tomenni lle bydd yn pydru ac yn creu nwyon tŷ gwydr.

Dechrau proses ailgylchu papur yw ei gasglu....ei ddidoli ....a’i drefnu. Wedyn, bydd gweithwyr melinau papur (megis yr un yn Shotton, Glannau Dyfrdwy), yn ei gymysgu gyda chemegion a dŵr mewn tanc i wahanu’r ffibrau.

Yna, byddan nhw’n ei hidlo i dynnu clipiau, disgiau a sbwriel arall.

Cyn ei lanhau a thynnu’r inc trwy ei droi mewn tanc pigfain.

Byddan nhw’n ychwanegu cynhwysion i’w wynnu yn ôl yr angen cyn pwmpio’r cyfan (99% yn ddŵr ac 1% yn ffibr) ar y peiriant papur.

Byddan nhw’n ei symud ar draws sgrin sy’n siglo i dynnu’r rhan fwyaf o ddŵr, gan adael y ffibrau y byddan nhw’n eu defnyddio i wneud papur, cardfwrdd neu bapurau newydd.

Bydd y papur yn mynd trwy gyfres o roleri poeth mawr nes bod canran y dŵr yn gywir a’r trwch yn addas. Wedyn, bydd y gweithwyr yn ei weindio am roleri enfawr.

Weithiau, byddan nhw’n rhoi wyneb gloyw neu afloyw ar y papur pan fo’n symud ar hyd y peiriant.

Bydd y rholeri mawr yn cael eu rhannu’n riliau llai, eu pacio a’u storio cyn eu hanfon at yr argraffwyr i wneud rhagor o bapurau newydd.