Cwestiynau poblogaidd

Pwy fydd yn rheoleiddio’r cyfleusterau gwastraff newydd yma?
Mae cyfleusterau trin gwastraff ymhlith y diwydiannau mwyaf rheoledig yn y DG. Mae Asiantaeth Amgylchedd Cymru yn cadw llygad ar gyflawniad y cyfleusterau yma’n rheolaidd ac mae ganddi rwydd hynt i weld canlyniadau profion a monitro allyriadau. Os yw’r cyfleuster yn defnyddio technoleg hylosgi, bydd hefyd yn gorfod cydymffurfio â lefelau caeth Cyfarwyddyd Hylosgi Ewrop o ran allyriadau. Mae sawl cyfleuster eisoes yn cyhoeddi beth yw eu hallyriadau.

A ydy hylosgi yn cynhyrchu lefelau diocsin uchel ac a fydd yn effeithio ar fy iechyd?
Mae cylchoedd pwysedd yn sôn am ddiocsin yn aml - sef y cemegau sy’n effeithio ar iechyd, ond ychydig iawn ohonyn nhw mae cyfleusterau hylosgi yn eu cynhyrchu. I’w roi mewn cyd-destun, mae 14 y cant o allyriadau diocsin y DG yn cael ei gynhyrchu ar noson Guto Ffowc yn unig. Ac yn ôl adroddiad diweddar gan Asiantaeth Amgylchedd Cymru, byddai llosgi gwastraff y cartref yn cynhyrchu llai nag 1% o allyriadau diocsin blynyddol y DG. Yn sgîl technoleg well a rheoliadau llymach, mae allyriadau llosgi wedi gostwng yn sylweddol a bydd yr allyriadau’n cael eu rheoleiddio’n ofalus i ofalu bod y tueddiad yma’n parhau. Cewch weld sawl astudiaeth iechyd drwy ddefnyddio tudalen y cysylltiadau.

Sawl cyfleuster fydd eu hangen arnon ni?
Mae cynghorau ledled Cymru yn cydweithio mewn partneriaethau rhanbarthol i ganfod y dull mwyaf cynaladwy, cost-effeithiol ac ymarferol o drin ein gwastraff. Drwy weithio fesul rhanbarth, go brin y bydd llawer o gyfleusterau trin gwastraff newydd, ond bydd nifer fechan ohonyn nhw’n cael eu hadeiladu fydd yn gallu mynd i’r afael â’r gwastraff sy’n cael ei greu yng Nghymru’n gyffredinol.

Ble caiff y cyfleusterau yma eu hadeiladu a phryd?
Bydd angen adeiladu sawl cyfleuster trin gwastraff newydd ledled Cymru yn ystod y blynyddoedd i ddod a bydd pob un yn gorfod cydymffurfio â phrosesau cynllunio a chaniatáu caeth. Bydd angen i awdurdodau lleol ddod i benderfyniadau anodd dros ben ynghylch ble i’w hadeiladu yn ogystal ag ystyried materion megis tai lleol, cludiant a pha mor agos yw’r safleoedd at gyfleusterau trin gwastraff eraill. 

Bydd diwydiant preifat yn dylanwadu ar yr hyn sy’n cael ei adeiladu a phryd. Tra bod cynghorau ledled Cymru yn awyddus i brynu cyfleusterau newydd i drin gwastraff cartrefi, bydd cwmnïau preifat hefyd yn cyflwyno ceisiadau i adeiladu eu cyfleusterau eu hunain i drin gwastraff masnachol a diwydiannol. Er nad yw’r awdurdodau lleol yn gyfrifol am gynnig y cyfleusterau newydd yma, maen nhw’n gyfrifol am werthuso unrhyw gais cynllunio gan gwmnïau preifat.

Bydd cydweithio â’r cyhoedd drwy gydol y broses gynllunio yn hanfodol. Bydd angen ymdrech genedlaethol enfawr i greu Cymru ddiwastraff ac mae’n hollbwysig eich bod yn cymryd rhan.

Rydyn ni’n sylweddoli bod hwn yn bwnc hollbwysig. Cysylltwch ar bob cyfrif os oes gennych chi unrhyw gwestiynau ychwanegol.