Ffoniwch eich awdurdod lleol i gael gwybod beth y gallwch chi ei ailgylchu ac ymhle
Chwilio am fanciau ailgylchu
Yr anrhegion Gwyrdd gorau ar gyfer Sul y Tadau
9 Mehef 2008
Gyda Sul y Tadau’n prysur agosáu (15 Mehefin), mae cynllun ‘Craff am Wastraff’ yn ein hannog i edrych y tu hwnt i deis a sanau ac ystyried anrheg unigryw a diwastraff.
Mae cynllun ‘Craff am Wastraff’, yr ymgyrch sy’n annog pobl i arbed, ailddefnyddio ac ailgylchu gwastraff, wedi llunio rhestr o anrhegion gwych a fydd yn rhoi pleser mawr i dadau sy’n gweithio’n galed ac yn lleihau’r gwastraff sy’n cael ei anfon i safleoedd tirlenwi drannoeth.
Meddai Gwenan Davies o gynllun ‘Craff am Wastraff’: "Sul y Tadau yw’r esgus perffaith i roi maldod a ’chydig o sylw ychwanegol i dadau.
"Fodd bynnag, mae’r holl anrhegion mae tadau o bob cwr o Gymru’n eu derbyn ar Sul y Tadau yn creu llawer o wastraff.
"Fel y gwyddom, mae angen i ni leihau’r gwastraff rydyn ni’n ei daflu yma yng Nghymru, felly rydyn ni wedi creu rhestr o syniadau gwych ar gyfer diolch i’n tadau am eu holl waith caled, yn ogystal â sicrhau mai hwn fydd y Sul y Tadau gwyrddaf erioed."
Dyma bum prif awgrym cynllun ‘Craff am Wastraff’ ar gyfer cadw tadau’n hapus a helpu i leihau’r gwastraff a anfonir i safleoedd tirlenwi:
1. Diwrnod o chwaraeon
Yn hytrach na thei neu bâr o sanau arall, ewch â’ch tad i’ch parc neu’ch canolfan chwaraeon leol am ddiwrnod o chwaraeon. O golff i bêl-droed, mae’r anrhegion hyn yn ddifyr ac nid ydynt yn creu unrhyw wastraff o gwbl.
2. Antur yn y gegin
Yn hytrach na phrynu cacen, mentrwch i’r gegin a gofynnwch i’r plant eich helpu chi gyda’r pobi. Mae hyn yn golygu llai o becynnu, ac mae anrhegion cartref yn ddiwastraff AC yn golygu mwy i dadau sy’n gwerthfawrogi ymdrech bersonol.
3. Gwasgu caniau
Hwyrach ei fod yn swnio’n hurt, ond beth am brynu gwasgwr caniau? Mae’n ffordd dda o leihau straen a, thrwy wasgu’r caniau, rydych chi’n gallu ffitio mwy o eitemau yn eich cynhwysydd ailgylchu.
4. Cardiau, cardiau, cardiau
Mae defnyddio deunyddiau sydd gennych chi o gwmpas y tŷ i wneud cerdyn cartref arbennig yn syniad gwych. Os ydych chi’n chwilio am gerdyn ffantastig, does dim byd yn well na cherdyn cartref i’ch tad.
5. Enwi coeden
Pa well ffordd o helpu’r amgylchedd na thrwy blannu coeden yn enw’ch tad. Waeth a ydych chi’n plannu’r goeden gartref neu’n prynu pecyn, bydd eich tad wrth ei fodd gan y bydd yn helpu’r amgylchedd heb orfod codi bys! A bydd hi’n rhywbeth i’w gwerthfawrogi am flynyddoedd i ddod, yn hytrach na phâr arall o sanau i’w roi yn y drôr!