Ffoniwch eich awdurdod lleol i gael gwybod beth y gallwch chi ei ailgylchu ac ymhle

Cynllun Craff Am Wastraff yn targedu gwastraff bwyd

1 Tach 2007

Heddiw, lansiodd cynllun Craff am Wastraff, y sefydliad sy’n ein hannog i arbed, ailddefnyddio ac ailgylchu ein gwastraff, ei ymgyrch gyntaf erioed i gymell aelwydydd ledled y wlad i geisio taflu llai o wastraff bwyd.

Nod yr ymgyrch newydd, ‘hoffi bwyd casáu gwastraff / love food hate waste’’, sy’n cael ei chefnogi gan gogyddion a gweithwyr bwyd proffesiynol adnabyddus, yw dangos faint o’r 350,000 tunnell o’r gwastraff bwyd sy’n cael ei daflu yng Nghymru bob blwyddyn y gellid ei ddefnyddio. Mae Dudley Newbery, y cogydd o Gymru, yn cefnogi’r ymgyrch a bydd yng Nghaerdydd a Bangor yn arddangos ryseitiau cyflym a hawdd yn defnyddio sbarion cyffredin.  Hefyd, mae cogyddion fel Hugh Fearnley-Whittingstall, Anthony Worrall-Thompson a Ken Hom wedi darparu ryseitiau a chynghorion i’n helpu i wastraffu llai o fwyd.

Meddai Dudley Newbery:

Dudley Newbery"Anodd credu ein bod yng Nghymru yn taflu oddeutu traean y bwyd a brynir bob blwyddyn – felly mae’r ymgyrch yn gofyn i bobl feddwl am ffyrdd o helpu i leihau’r gwastraff hwn.  Mae llawer o bobl yn credu nad yw taflu bwyd cynddrwg â thaflu mathau eraill o wastraff am ei fod yn pydru.  Ond mae gwastraff bwyd yn cymryd llawer o le yn ein safleoedd tirlenwi ac yn rhyddhau'r nwy tŷ gwydr niweidiol methan.  Ac wrth gwrs, mae gwastraffu bwyd yn gwastraffu’r holl adnoddau sydd wedi cyfrannu at ei gynhyrchu a’i gludo.

"Rwy’n cefnogi’r ymgyrch drwy ofyn i bobl feddwl ychydig yn fwy gofalus am y bwyd y maent yn ei ddefnyddio - cynllunio prydau ymlaen llaw i ddefnyddio bwydydd yn nhrefn dyddiadau oes silff, a defnyddio sbarion mewn pryd arall yn hytrach na’u taflu.  Gellir gwneud cymaint o brydau blasus gyda ‘sbarion’ neu fwyd a fyddai’n cael ei daflu fel arall, ac mae cynllun Craff am Wastraff wedi bod yn gweithio gyda llu o gogyddion a phobl sy’n ysgrifennu am fwyd i greu ryseitiau ar gyfer bwydydd sy’n cael eu gwastraffu amlaf.  A chan ein bod yn taflu gwerth £400 miliwn o fwyd yng Nghymru bob blwyddyn, dylai’r ryseitiau hyn ein cynorthwyo i arbed arian yn ogystal â diogelu’r amgylchedd."

Cynghorion i leihau gwastraff bwyd:bwyd

  • Defnyddiwch eich rhewgell yn effeithiol.  Os oes gennych chi fwydydd fel bara neu laeth na fyddwch yn eu bwyta ar unwaith, rhowch nhw yn y rhewgell.  Mae modd gratio caws a thorri cyw iâr yn stribedi a’u rhewi.  Cofiwch eu dadrewi’n drylwyr a’u defnyddio’n syth wedyn.

  • Gallwch ddefnyddio’ch oergell i ailfywiogi hen lysiau.  Rhowch fwydydd fel moron neu giwcymbrau sydd wedi meddalu mewn dŵr oer - byddant yn caledu o fewn dim.

  • Mae’r mwyafrif o oergelloedd yn rhy gynnes i fod yn effeithiol iawn – gofalwch bod eich un chi rhwng 1 a 5 gradd canradd er mwyn i’r bwyd bara mor hir â phosibl.

  • Mae hyn yn ymddangos yn gwbl amlwg, ond agorwch eich cypyrddau a’r oergell cyn siopa i sicrhau nad ydych chi’n prynu eitemau sydd gennych eisoes.

  • Mesurwch reis a phasta cyn eu coginio i sicrhau nad ydych chi’n coginio gormod.  Yn fras, mae oedolyn angen 75ml – pum llwy fwrdd o reis.

  • Mae modd arbed bwydydd na ellir eu bwyta rhag mynd i’r bin.  Rhowch gynnig ar gompostio i gael gwared ar groen ffrwythau a llysiau, bagiau te a phlisgyn wy – ffordd dda o gael compost cyfoethog am ddim ar gyfer eich gardd.